Chola | ചോല

Chola | ചോല

വി. ഷിനിലാലിൻ്റെ കഥാസമാഹാരമാണ് ‘ചോല’. ആദിവാസികളെ, ആദിവാസികളല്ലാത്തവരുടെ ജീവിതശൈലി സ്വീകരിക്കാൻ പ്രേരിപ്പിക്കുന്നത് തെറ്റല്ലേ എന്ന ഗൗരവമായ ചോദ്യമാണ് ഈ കഥ മുന്നോട്ടുവെക്കുന്നത്. വടക്കുകിഴക്കൻ ഇന്ത്യയിലെ ആദിവാസികളെ അവരുടെ പരമ്പരാഗത തൊഴിലുകൾ ചെയ്ത്, പരമ്പരാഗത സംസ്‌കാരം അതേപടി കാത്തുസൂക്ഷിച്ച് ജീവിക്കാൻ അനുവദിക്കണമെന്നുള്ള വിഖ്യാത നരവംശശാസ്ത്രകാരനായ വെരിയർ എൽവിൻ നെഹ്‌റുവിന് മുന്നിൽ വെച്ച നിർദ്ദേശവും ഈ കഥയുടെ വായനയെ സ്വാധീനിക്കുന്നു. “ആ നിർദ്ദേശം സ്വീകരിച്ചിരുന്നുവെങ്കിൽ ഇന്ത്യയിലെ ആദിവാസികളുടെ ജീവിതം ഇന്നത്തേതിനെക്കാൾ വളരെ മെച്ചപ്പെട്ടതാകുമായിരുന്നോ? അതോ അത് ഇപ്പോൾ അങ്ങേയറ്റം പരിതാപകരമായ അവസ്ഥയിൽ എത്തിച്ചേർന്നിട്ടുണ്ടാവുമോ?” എന്നിങ്ങനെ ഈ കാര്യങ്ങളിലേക്കും അവയോട് ചേർന്നുപോവുന്ന പല ഓർമ്മകളിലേക്കും അവ്യാഖ്യേയമായ ഏതൊക്കെയോ വികാരങ്ങളുമായി നടന്നും ഓടിയും ചെന്നുചേരുന്ന വായനാനുഭവമാണ് ഷിനിലാലിന്റെ ‘ചോല’ നൽകുന്നതെന്ന് എൻ. പ്രഭാകരൻ അഭിപ്രായപ്പെടുന്നു. സാമൂഹിക വിഷയങ്ങളെക്കുറിച്ചും ആദിവാസി ഗോത്രജീവിതത്തെക്കുറിച്ചും ആഴത്തിൽ വായിക്കാൻ ആഗ്രഹിക്കുന്നവർക്ക് വേണ്ടിയുള്ള സമാഹാരം.